مشكله حياتي

مشكلتي في حياتي أني أمتلك موهبتين واني متمكن فيهم والمشكله ان مينفعش اجمع بين الأتنين الحمدلله ربنا وهبني ذكاء الحمدلله زي الناس حوليا مبتئول اللهم لاتكبر ولا افتخار ذكاء محصلش وأني أمتلك قدم اروع يعني بلعب كوووره حلو جدااا وربنا وفئني ودخلت كليه صيدله بعد سنتين الله يشهد اني مكنتش بذاكر ألا اخر أسبوع وبائي السنه تايه بين لعب الكوره ولعب شطرنج ولعب بلاستيشن يعني مشكلتي ان كل حاجه ليا فيها لدرجه يا جماعه أني والله كان ورايا امتحان أحياء يوم سبت تقريبا وكنت بلعب كوره نهائي دوره مجمعه يوم الأربعاء وطبعا عندي مامتي شغاله بئا مناحه طبعا في البيت على بعمله أنا المهم ربنا سهل وسبحان الله جبت خمسين في الاحياء لان الامتحان كان بيعتمدعلى الفهم وبعد منتيجه التنسيق ظهرت وحد جالي على البيت وقلي انا النادي المعين عايزني ألعب فيه هو نادي كبير في مصر وبلعب ممتاز وانهم بيدوا مرتبات كويسه وبتاع وانك تنتظم في التدريب اللي حيكون صبح وليل غير المباريات وكده طيب والكليه اعمل فيها ايه كليه طبعا عايزه حضور مستمر ومينفعش أجمع بين الكليه ولعب الكوره طيب انا اتخلى عن مين فيهم بصراحه الناس كلها بتئلي كليه ايه يا عم خليك لعيب كوره أحسن وريح دماغك وبكره يبئا معاك فلوس كتير وناس تانيه بتئلي خليك في الكليه لو رجليك أتكسرت من الصبح حتكون في الشارع طيب اعمل أيه حد ينصحني

ممكن يا دكتور تبقى فى الكليه و تلعب فى النادى بس طبعا الموضوع ده عايز تنظيم للوقت
انا اعرف واحد كان فى هندسه و فى نفس الوقت بيلعب رياضه فى النادى و بيمثل مصر فى اللعبه اللى بيلعبها سهل يا دكتور انك تلعب كوره و تبقى فى الكليه غير ان حضرتك بتقول انك تتمتع بذكاء طب ليه حضرتك تسيب الكليه و حضرتك ممكن تلم المنهج بسرعه بس يا دكتور متخليش الكوره تاخد الوقت كله و تنسى المذاكره والكليه
تقبل مرورى
و اتمنى من الله ان يوفقك للطريق الصحيح

شكراااااااااا يا ديرو على النصيحه بس انا ممكن أجمع الاتنين بس أن شاء الله حاخد السنه في سنتين

لا يا دكتور امال فين الذكاء؟؟

ان شاء الله ربنا يوفقك للخير يا دكتور

نصيحه لوجه الله
ماتسبش أبدا الكليه
لازم يبقى معاك شهاده
الكورة مش مضمونه
ياعنى لو لاقدر الله لا قدر الله جاتلك اصابه تمنعك م لعب الكورة
هتشتغل ايه؟؟ وهتصرف منين؟؟
صلى صلاة الاستخارة وربنا يعملك اللى فيه الخير

أوك يا دكتور نغم أنتي ودكتور ديرو شكرا على النصيحه جدااا ان شاء الله اصلي صلاه استخاره

من راىء اختك الصغيرة العب كورة اوك لانى والله لو كنت ولد لكنت لعبت وروح الكلية عادى جدااا عندك هيثم السعيد بتاع السلة فى الزمالك مهندس كبير وعادى وكمان بجد بجد حول القاهرة صيدلة وحاول تذاكر والعب الكورة هواية عندك بنات الاسكواش مثلا فى كلية صيدلة ووواخدين اوائل العالم فى العبة لسة السنة دى عادى يا دوك احمد ذاكر وخد الكورة موهبة لكن ركز اكتر مذاكرة

هو موضوع الكورة ده مينفعش يتأجل لحد ما تخلص الكلية ؟

والله مينفع يا دكتور لو خلصت كليه حوصل تقريبا 23 سنه لو مدبلرتش يعني وساعتها حتكون فرصتي ضعيفه

شكرااا يا دكتور على النصيحه بس هو لسه في تحويل

هى فرصة حلوة طبعا حكاية الكورة دى بس انا من رأيى انك متسيبش الكلية ومتنساش انك تعبت علشان تدخل الكلية دى ع الاقل ف الاسبوع اللى قبل الامتحانات وبعدين محدش يسيب كلية صيدلة ويحول كلية تانية بس ف النهاية الامر ده يرجعلك انت وصلى استخارة وشوف انت هترتاح لايه بالظبط وربنا يقدم اللى فيه الخير

أن شاء الله حصلي صلاه أستخاره ربنا يسهل بصراحه أنا محتار والمشكله كمان في والدتي رافضه لأنها بتخاف عليا لأني الوحيد عندها ورافضه جدااا وكل ملعب كووره أروح البيت ألائيها عماله تعيط وخايفه اتكسر ولا يجرالي حاجه بتئلي يا واد حتروح القاهره تبوظ وحتتلم على عيال يفسدوك واخلاقك تبوظ على أاساس أني أبو الاخلاق حاليابجد موضوع في قمه الحيره وجي في وئت كنت بستعد للكليه أنا بئطع في شعري وفي نفسي بصراحه وعايز أضرب حد ولا حاجه علشان استريح ولا كسر حاجه

حضرتك اصلا لو حولت كلية تانية عاوز تحول ايه؟

ححول صيدله القاهره ححول أيه يعني

لو انت شايف انك هتعرف توفق بين الاتنين يبقى خلاص دوس ف موضوع الكورة
بس انا من وجهة نظرى ان المقام الاول للكلية لانها ان شاء الله هتفضل معاك طول العمر مش هتقعد معاك كام سنة وبعدين تقولك خلاص استغنيت عنك لانك كبرت ف السن. طبعا مع احترامى لأى رأى تانى

شكرااا يا دكتور على النصيحه والله لازم أضحي بحاجه بس هيا أيه دي المشكله

عموما خليني في العيد أحسن أنا صدعتكم معايا بعد العيد يحلها ربنا من عنده يمكن يلغوا الدراسه السنه دي ياااه يبئا هاني هلال عمل فيا معروف بصراحه

ههههههههههههه
ع العموم كل سنة وحضرتك طيب وكل الناس اللى ف المنتدى طبعا
وربنا يقدم اللى فيه الخير ومحدش عارف بكرة مخبى ايه

وانتي طيبه بالنيابه عن الناس اللي في المنتدى كلهم دلوئتي بيحلموا أحلام سعيده وحطين لبس العيد تحت السرير ومستنين الصبح يجي يلا ناس في نعيم وناس في يلا ربنا يسهل

ههههههههههههههههههههههه أوك يا دكتور بس انا متفق على لعب كوره الصبح العيال يبئا معاه فلوس كتير في العيد بنلعب على 30 جنيه الوحد مش قمار يعني والفلوس اللي بتطلع بنشتري بيها حاجه نوزعها على الفريق الكسبان العيد والله كله منافع

أنا رايي تروحي تنامي يا دكتور أنتي أكيد تعبانه النهارده في التجهيز للعيد كحك ومسيح وتنضيف الحمدلله أني مش بنت

هههههههههههههههههههه والله بجد النهاردة اليوم كله كان تعب بس انا بحب اسهر يوم الوقفة لحد ما اروح اصلى ولما ارجع ابقى انام لان دى الحاجة اللى بحس فيها بالعيد
وربنا يكرمك بكرة وتكسب الماتش وتاخد الهدية

أنتي بتروحي تصلي العيد ربنا يكرمك يا دكتور أنا حاسس أنك بتروحي زي حالاتي تتفرجي على الموضه اللي بتبئا يوم العيد كل وحد ووحده لابس حاجه شكل

ههههههههههههههه لا والله انا بروح علشان اسلم ع الناس اللى مشفتهمش من زماااااااااااااان او بمعنى اصح مش بشوفهم غير م العيد للعيد
وبعدين الموضوع كدة اتغير من المشكلة بتاعتك لمشكلة العيد وانا حاسة ان الناس لما تصحى هتسيب مشكلتك وتقعد تتكلم ف العيد وانت اللى جبته لنفسك

ههههههههههههههههههه أوك يا دكتور ربنا يسامحك فكرتيني بعد منسيت هو انا كنت خدت قرار بس حشوف هو جواب نهائي ولا لا يلا ربنا يسهل