اهلا بطلبة اعدادي صيدلة طنطا

السلام عليكم ورحمة الله وبركاته
انا هجمع هنا الكلام اللي اتقال في منتدى بوابة الثانوية العامة علشان الناس تقدر تشوف الموضوع تاني وتستفاد منه

موضــــــــــــوع لابـــــــــــــــــــــ منه ــــــــــــــــــــــد للطلبة الجدد
اهلا ومرحبا بكم في بيتكم الثاني واسرتكم الثانيه في كليــــــــــــــــــــــ الصيدلة ــــــــة جامعــــــ طنطا ـــــــة

عالم جديد ........ وامل مشرق

انما المريض ممكن جدا يروح للصيدلى من غير ما يعدى على طبيب





كمان من الحاجات المهمة اللى بترجح كفة صيدلة عند الطالب لو هو بيحب الكيميا واحيانا كتيرة وهنا امثلة كتيرة لو بيحب الرياضيات بس خايف من رياضة اتنين او اهله عاوزين يبقى دكتورة فبيختار احسن فرصة قدامه لانه ملوش فى البيولوجى قوى وبيختار صيدلة اللى تعتبر كلية شيك فى نظره ومستقبلها وتقيمه لها افضل من طب




وعلى فكرة ناس كتيرة اعرفها كانوا عاوزين يدخلوا هندسة ولما النصيب جابيهم صيدلة وشافوا زمايلهم فى هندسة وخصوصا هندسة شبين والمنصورة والقاهرة واسكندرية دول يعني الاول قالوا الحمد لله على النعمه اللي احنا فيها





طبعا فى ناس دخلت علشان المجموع جابها هنا ودى بتبقى ناس مخنوقة من الكلية جدا لو كانوا اصلا من البداية مش عاوزين يدخلوها




اقول لكم حاجة




انا اعرف واحد والله قعد فى طب اربع سنين ومقدرش يكمل وبعدها حول صيدلة




علشان كان مستخسر المجموع بتاعه




وفى ناس الاتنين مجموعها وميولها




وفى طبعا ناس مجموعها يجيب طب وبتدخل صيدلة لانها شيفاها احسن ودول ناس انا بحترم فيهم حسن تقدير لهم للامور ولانهم شايفين المستقبل قدامهم بطريقة كويسة





طيب ليه طنطا افضل من اى كلية تانية فى صيدلة ؟؟؟؟؟




انا مقدرش اقول انها افضل




بس بالنسبة للجامعات الاقاليم اللى حواليها تعتبر افضل واعرق صيدلة فيهم




يعنى اولا المشهور قوى فيها موضوع الكلينكال وهو انك تقدر تشخص بعض الامراض من غير ما المريض يروح للدكتور




ده الى معروف للناس




بالنسبة لى انا كطالب
ان اى حاجة بتتقال فى المحاضرة بنسبة كبيرة بتعرف تجيبها




يمكن المادة العلمية كبيرة جدا ومعقدة




بس الامتحانات عموما بالنسبة لى لو انت ذاكرت من الورق المنهج كنت هتحل فيهم كويس جدا




على حين بعض الكليات الاخرى زى المنصورة




المنهج سهل بدرجة اكبر من عندنا




بس نظام امتحانات معقد جدا اكتر من عندنا





بجد الدكاترة عندهم فى الامتحانات

يعنى هقول



no comment




طبعا نظام المذاكرة وهتذاكر منين هنقوله بس فى بعد كده ان شاءالله





دلوقتى نيجى انت حالتكم هتبقى عاملة ازاى



فرحان بالكلية الجديدة



وفخور بيها



اولا



هتحس انك كده فى حالة نشوة ونشاط وعاوز تعمل كل حاجة تفيدك فى كليتك ومهنة المستقبل



وعاوز تستفيد من كل حاجة هتتقال



وده برضو هنتكلم عنها يمكن فى حلقة تانية موضوع انك هتستفاد ايه من الكلية والواقع عامل ازاى




علشان عادة انت بتدخل الكلية باوهام مش هتفوق منها غير تانى سنة




اولا انت فى الكلية اللى يمكن بيخليك تحس انك بعد الثانوى قدمت رسالتك خلاص فى الحياة انك هتبقى مستريح نفسيا لانهم كمان هما عادة فى البيت بيكونوا حاسين انك قطعت شوط المهم فى المبارة والباقى عاوز درجة اقل من المجهود



هيبقى لك درجةحرية اكبر تروح وتلعب وقت الدراسة وتخرج ويمكن وقت الامتحانات كمان وهتصاحب ناس كتير وتتعرف على اشكال واصناف من الناس من بلاد مختلفة



وهتحس بعد فترة ان الدفعة كلها اصحابك



والكلية هتغير من شخصيتك تماما

حتى لو انت شخصية انطوائية الكلية فى خلال ترم وبعد ما يخلص لو انت استجبت للتغير ده هتتحول للعكس تماما

وده مش وحش انك يبقى لك علاقات كويسة مع ناس كتير وتعرف ناس كتير





اكيد احسن ما يكون لك صاحب واحد او اتنين او حتى عشرة





غير ان قدرتك على الاعتماد على نفسك هتزيد





وهتتعلم حاجات كتيرة عن الحياة فى خلال الخمس سنين

وهتتبدل حاجات كتيرة صدقنى

وهتتعرض لصدمات وحالات اكتئاب





يعنى هتشوف حاجات كتير فى الكلية






كمان عاوز اقول لك حاجة





الكلية المرحلة الوحيدة





اللى انت هيسمح لك انك تعيش حياتك





لسبب بسيط





ان قبلها كان الثانوى ومرحلة الحرمان الاجبارى





بعدها الجيش والشغل ومحاربتك علشان تستقر وتكون اسرة ومرحلة الحرمان الاجبارى برضو بس هيكون نابع منك مش من شخص تانى





يعنى الكلية من الاخر ذاكر وعيش حياتك مش تعيش حياتك وطنش للدراسة





اكيد انت مش هتنجح كده من غير اى مجهود فى كلية صعبة والمناهج فيها ضخمة زى عندنا

مرة تانية بقول لك انت اخترت اختيار صح


هتتعب اه فى الكلية شوية

بس هتحس صدقنى انك اخترت صح لما تعرف بعد كده الفرق بينك وبين اللى دخل طب واسنان



مع احترامى ليهم طبعا




المرة الجاية ان شاء الله هنتكلم عن احلامك كطالب جديد



والواقع وده مرضتش اخليه فى اول مره علشان متحولش من الكلية ولا حاجه
فخليك متفائل شوية



اما عن المذاكرة ومعلومات عن كل مادة



زى ما قلنا



هنخليها قبل الدراسة



برضو الحلقة الجاية هنتكلم عن الانشطة الطلابية اللى عادة انت بتدخل ومفيش فى دماغك حاجة جوا الكلية غير الدراسة بس وان الانشطة دى زى حصص الرسم والمجال الزراعى والصناعى فى المدرسة



فعاوز اشيل الفكرة الخطا دى من دماغك



ونعرفك الحقيقة

وانتظرونــــــــــــــــــــــــــــــــــــــــــ ـــــــــــــــــــــــــــــــــــــــــا

ان شاء الله حلقة النهارده هتكون عن......
نظام مذاكرة كل ماده
ومعلومات عن المواد
والامتحانات
وازاى تذاكر
واالدكاترة
والكورسات

فى الحلقة السابقة

*قلنا مبروك للدفعة الجديدة
*وقلنا لهم انهم احسنوا الاختيار
*وقلنا ليه صيدلة افضل من غيرها
*وليه صيدلة طنطا بالذات افضل من غيرها
*وقولنا ان الاشاعة بان الكلية اسهل من الثانوى دى اشاعة مش صحيحة
لكن العامل النفسى والراحة هى اللى بتخلينا نشعر بده
خصوصا ان الاهل كل اللى عاوزينه ان الابن يدخل الكلية الفلانية وخلاص
وقلنا هنلاقى الناس مش فارق معاها وقت دراسة من اجازة من اامتحانات والناس بتخرج وعايشة حايتها عادى

ده تقريبا ملخص اللى اتقال

.................................................

فى الحلقة دى هنتكلم عن
المواد اللى علينا والنظام ماشى ازاى
يعنى ربنا يسهل لو اقدر افيد ولو معلومة صغيرة
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,
الدراسة عندنا على ترمين
وترمين صغيرين كمان
كل ترم منفصل على الاخر
وكل ترم يعتبر سنة دراسة منفصلة
عكس بعض الكليات زى المنصورة لو مثلا عندك فى الترم الاول عقاير وفى الترم التانى عقاقير لو انت شلت عقاقير الترم الاول وجبت فى الترم التانى مثلا جيد جدا ممكن ينجحوك فى الترم الاول وتاخد مثلا فى المادة كلها على بعضها جيد او مقبول

عندنا مفيش النظام ده
عندنا كل ترم منفصل عن التانى
وكل ترم له درجات الرأفة بتاعته لوحدها
وله نظامه ومواد مختلفة عن الاخر

السنة دى عندنا سبع مواد
فيزياء
نبات
كيمياء فزيائية
رياضيات
انجليزى
حيوان
مدخل صيدلة
.................................................

المطلوب منك فى ترم علشان تنجح.............

لو كنت شايل مواد تشيل مادتين اساسيتين ومادتين غير اساسيتين
وتنجح فى الباقى
يعنى لو شلت اكتر من كده لقدر الله تقعد السنة

طيب المواد الاساسية اللى عندك الترم ده
الفزياء والنبات والحيوان ومدخل الصيدلة والكيمياء الفزيائية

المواد الغير الاساسية
الباقين
اظن واضح من تقسيمة المواد لي سموها اساسية وليه غير اساسية

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــ


طيب ليه انت بتدرس المواد العجيبه وايه علاقة المواد دى بالدواء..................

المفروض كليتك بتتخرج منها وعندك تصريح مزاولة مهنة معينه
عكس مثلا كلية العلوم
فاانت بتاخد المواد اللى بتخليك تشتغل المهنه دى بالاضافة لمواد تانية علمية ممكن يكون قائم عليها المواد اللى انت هتاخدها علشان تزاول مهنتك
فلازم يبقى فى اساس علمى
وطبعا ده كلام نظرى مش بيحصل فى مصر والكلام ده كله مش هتفتكر منه حاجة والمهنة بتاعتك هتزاولها بعد كده بالخبرة والمعرفة اللى هتكتسبها من بره الكلية
المهم نرجع لموضوعنا
المطلوب منك انك فى كل ترم علشان تعدى ميكونش معاك اكتر من مادتين اساسيتين ومادتين غير اساسية
والمادتين دول بتمتحنهم السنة اللى بعدها فى الاجازة مش فى نفس الاجازة بتاعتك
وخلى بالك لو انت لقدر الله شلت مادة فى اعدادى
وجيت فى اولى منجحتش فيها برضو وشلت كمان من اولى مادتين
كده يبقى انت معاك تلت مواد لقدر الله
للاسف هتبقى راسب

*وان شاء الله كلكم تبعدوا عن الحاجات دى
بس انا بقول لكم كده علشان تبقوا فاهيمن كل حاجة فى الكلية

****
فى كل مادة علشان تنجح فيها..................
عادة بيكون عندك امتحان تحريرى وامتحان عملى واحيانا شفوى وكمان حاجة اسمها شيت sheet او mid-term
وال sheet ده اسمه كده لان كلمة شيت يعنى ورقة لانه بيبقى صغير وبيكون فى ورقة واحدة بس
وده بيبقى تقريبا فى الاسبوع الخامس او السادس من الدراسة بيبقى امتحان عليه 10% من الدرجات
امتحان صغير مدته ساعة الا ربع
يعنى هى فكرة الامتحان انه معمول علشان الطالب يحصل ويذاكر اول باول
طبعا انتم بتتخضوا لما بتسمعوا امتحان فى اول شهر ونص من الكلية
وانتم مش عارفين تذاكروا
متقلقوش

طيب نرجع تانى لموضوعنا
*****************************

علشان تنجح لازم فى امتحان اخر الترم تجيب تلت الورقة
وده اهم شرط
بعد كده يبدوا يضيفوا درجات العملى والشيت والشفوى
ولو كل ده مجبش نسبة النجاح وهى 60% مش 50% بيبقى فى درجات الرافة وهى عادة الاول بتكون فى درجات رافةللدفعة كلها
يعنى مثلا نسبة الناجحين فى الدفعة لسه موصلتش لنسبة معينه لازم تنجح
فبيرفعوا الدفعة كلها مثلا خمس درجات
لحد ما يوصلوا لنسبه معينه يبقى كده خلاص
بعد كده انت المفروض ليك حوالى 40 درجة رافة
لو حليت تلت ورقة الامتحان وبعد اضافة درجات العملى والشفوى والشيت لسه موصلتش لنسبة 60% بيحطوا من درجات الرافة
لو برضو درجات الرافة مش هتنجحك يبقى مش هتتحط وتشيل المادة
لو انت كمان كنت شايل تلت مواد المفروض انك لقدر الله هتعيد السنة لو درجات الرافة دى هتخليك تعدى واحدة منهم علشان تنجح ويبقى معاك مادتين هتاخدهم انما لو الدرجات دى مش هتفيدك يبقى مش هتاخدهم وهتفضل شايل المواد الثلاثة
برضو لو انت شايل مواد كتير درجات الرافة ملهاش لازمة فمش هتاخدها
غير كده لو درجات الرافة دى هتنجحك وتخليك تعدى ولو على الحافة هتاخدها
وان شاء الله كلكم تجيبوا تقديرات كويسة ومتحتجوش لها ابدا

نيجى بقى نتكلم فى كل مادة لوحدها
.................................................. ........................
الفيزياء

انسى فزياء الثانوى دى خالص
والمسائل والكلام ده
المسائل فى المنهج عندنا تتعد على الصوابع وكلها سهلة ومن الكتاب
المنهج اصلا لسه محطوط من كام سنه
وقايم على الحفظ الصم
طالما انك حفظته كويس هتدخل تجاوب حلو قوى

المادة من 300 درجة زى معظم المواد فى صيدلة
60عملى
و 60شفوى
و 30 للشيت

***وعلى فكرة انت بتختار فى كل سنة فى صيدلة فى الترم الاول تلت مواد تمتحن فيها شفوى
ولازم يكونوا اصعب مواد عندك علشان تاخد درجات الشفوى بتاعتها
طبعا انت بتقول ده ان المواد الصعبه هبعد عن الشفوى
هفهمك النقطة دى بعدين بس ابقى فكرنى لو نسيت

دى توزيعة الدرجات

المنهج .....
مقسوم جزئين
جزء دكتور طارق النمر
وجزء دكتور فاروق

اول حاجة تشيل من دماغك فكرة انك هتجيب درجات نهائية زى الثانوى
انت فى الكلية المطلوب منك انك تطلع باقل خسائر
وبرضو اللى حاطط فى دماغه انه هيتعين معيد فى الكلية
احب اعرفك ان الدفعة حوالى 1200 واحد بيختاروا منهم اتنين بس
يعنى لازم اتنين يكونوا عقليات مهولة
واذا كنت انت فى الثانوى بتبان انك عبقرى علشان كان بيبقى معاك عقليات تانية اقل منك او زيك
دلوقتى انت مع ناس جايبين نفس مجموعك ويمكن احسن منك وفى نفس سنك وتفكيرك
وطبعا لكل مجتهد نصيب
بس علشان معظمنا بيبقى داخل نفسه فى الموضوع ده قوى
عموما لو انت شايف انك تملك المواصفات اللى تخليك من الاتنين دول فخليك على موقفك وحارب لحد ما توصل للمكان ده
وربنا ان شاء الله معاك ويوفقك
برضو شيل من دماغك انك هتدخل مذاكر المنهج كله وتراجع وتحل عليه نماذج الوزارة وسلاح التلميذ
ده مش شرط
طيب دلوقتى الفزياء هتتذاكر ازاى ........
احنا عندنا جزئين زى ما قلنا
جزء دكتور طارق النمر
وده تحاول تركز عليه فى المذاكرة بقدر كبير لانه بيبقى اسهل غير انه امتحان كمان بيبقى مباشر وهو كمان يعتبر فى المحاضرة شرحه مباشر
جزء دكتور فاروق
هو فى المحاضرة بيبقى بيشرح تقريبا على السبورة وانت هتقعد تايه فى الكتاب وراه
بس فى الاخر ذاكر من الكتاب او من الورق عادى


الفيزياء فى منهجنا مفهاش تقريبا فهم عبارة عن حفظ
مش مهم تفهمها
لانها ملهاش لازمة فى دراستك تقريبا على الاقل المنهج اللى انت هتاخده انا مش فاكر انى قابلت لحد دلوقتى كلمة واحدها من اللى خدتها في الفيزياء
ولا هتفيدك فى اى مادة فى صيدلة
فانت مجرد انك هتحفظها وتدخل تكتبها وتنسى بعد كده كل الكلام ده او حتى ممكن تطبق عليها بقى في مجالاتك

**وعلى فكرة امتحان الشيت عادة بيجى صعب جدا لكن هما فى الاخر بيبقوا عارفين ان الطلبة مش فاهمين منهم حاجة فبيجيبوا فى الاخر امتحان مباشر وسهل وكمان بيبقى تساهل شوية فى الدرجات

طيب هتذاكر منين .......

اول محاضرتين ممكن تذاكرهم من ورق مكتب التصوير
بعد كده الافضل لك تذاكر من ورق الكورسات حتى لو مش بتاخد كورس بيبقى اسهل واصغر وجايب الاجزاء المهمة اللى بتيجى فى الامتحان واللى ملوش لازمة مش بيتذاكر ودى عادة بتبقى سياسة المذاكرة بعد كده
انا يا جماعه مش بقولكم بالكلام ده اننا نهمل الكتاب لا الكتاب مهم برده وفي دكاتره بيركزوا على حاجات فيه وبيقولوا عليها في المحاضره
انا كنت عاوز اسيب موضوع الكورسات ده نتكلم فيه فى الاخر وورق الكورسات والكورسات كويسة ولا وحشة والكلام ده لان عادة انتم لما بتدخلوا الكلية بتاخدوا معلوماتكم فى الموضوع من مصدر واحد الكورسات بالنسبة له تعتبر تقليل من قدرته على انه يوصل المعلومة وانك بتروح تاخدها من شخص اخر مع ان الموضوع مش كده خالص هى الفكرة ان صعب ان الواحد يقدر يفهم فى وجود حوالى 1000 طالب او اكتر فى ظل الاعداد المهولة دى وفى ظل كمان ان المستوى اللى الدكتور بيشرحه فوق مستوى الطلبة اللى قاعدين وبالتالى بيضطروا يروحوا لوحاد تانى يقدر ينزل المعلومة لمستواهم خصوصا ان تقريبا وزارة التعليم العالى مش قادرة تفرق بين الباحث الاكاديميى والباحث التربوى بس هما تقريبا واخدين الموضوع انك طالما الشخص ده قدر يوصل المعلومة لدكاترة كبار وقدر ياخد شهادة دكتوراه فاكيد هو شخص بيقدر يوصل المعلومة لاى شخص تانى مع ان فى البعض مش بيعرف يوصل المعلومة للمستويات الاقل منه

هنتكلم دلوقتى على موضوع
الكورسات بايجاز.......
معظمكم قبل ما يدخل الكلية بيقول احسن حاجة بعد كده ان مفيش دروس والواحد هيستريح الاجازة كلها
هو فعلا احسن حاجة انك بتستريح الاجازة كلها
موضوع الدروس انا مش معاه ولا ضده
ولا هقول لك خد كورس
ولا متخدش انا عن نفسى بقدر احدد مصلحتى وعارف ان الكورس مش هيفدني وهعرف اوصل للمعلومه بطريقتي وعلى فكرة مش شرط كله يبقى زى بعضه لان فى ناس هترد على كلمه من غيرها مش هقدر انجح وتقول ما فى ناس بتنجح من غيرها
انا بقول دى حاجة شخصية اكيد مش كل الناس زى بعضها فى ناس ممكن تنجح من غيرها وناس تانية لاء
ومتسمعش كلام حد فى الموضوع ده
انت اكيد عارف مصلحتك فين وتعرف انت محتاج ايه

لو انت فى الكلية شايف انك هتعرف تمشى لوحدك وتقاوم وتحارب شوية وعندك امكانيات انك تذاكر وتجمع وتفهم وتحفظ نفسك
يبقى ابعد عن الكورسات خالص
وده افضل
على فكرة حاجة نسيت اقولها انت مش مطالب فى الكلية انك تفهم بقدر ما انت مطالب انك تحفظ وتحل فى الامتحان ودى هتبقى اول صدمة ليك فى الكلية
وبرضو بقول لك ماتسمعش كلام حد من اللى بيقول لك الكورسات وحشة
ولا اللى بيقولوا الكورسات حلوة
وهتلاقى فى طلبة احيانا موجودين فى اول كام اسبوع بيعملوا دعاية لموضوع الكورسات ده
سيبك من الناس دى خالص لانهم بياخدوا نسبة على الطلاب اللى بتيجى من ناحيتهم
شوف انت مصلحتك

طيب دلوقتى نرجع للفيزياء
هى المادة انا فى رايى اى مادة حفظ يبقى الكورس فيها ملوش لازمة
انت ممكن تذاكر من ورق الكورس تجيبه من حد من صحابك واكيد فى الاخر الحاجات دى بتبقى فى متناول ايد الجميع

لو اتكمنا على حضور محاضرات .......
انتم فى الاول هتحضروا كله وبعد كده اغلب الطلبة مش هتحب تحضر وهيقفوا مع بعض تحت الكوبرى او قدام المدرج على السلم
الفزياء زى ما قلنا هى مش محتاجة فهم يعنى ممكن بعد الشيت لو مش عاوز تحضر متحضرش وتذاكر لوحدك بس الحضور طبعا هيبقى عندك شوية معلومات عن المادة لما تيحى تذاكر وتبقى سمعت الكلام قبل كده وتخطط ورا الدكتور فى الكتاب
نظام الامتحان ::
عبارة عن short notes
او يعنى بنظام الثانوى اسمه اكتب ما تعرفه عن او انثر او اكتب نبذه عن


النبات

اكتر مادة اهتم بيها واكتر مادة صعبة وحاول تفهما كويس لانك هتحتاجها جدا بعد كده فى العقاقير الترم التانى
النبات من المواد الصعبة الطويلة اللى عاوزة فهم
ونفس تقسيمة الفزياء فى الدرجات
*وهى عبارة عن تلت اجزاء Morphology
مورفولجى
يعنى ازاى تصف النبات من بره وتتعرف عليه

*وال anatomy
يعنى التركيب من جوا والكلام ده

*وال taxonomy
يعنى التصنيف والازهار والكلام ده

الجزء التانى بتاع الانتومى عادة هو اطول جزء واكتر جزء بيجى متكرر من الامتحانات اللى قبل كده
المادة دى صعبة
واهتموا بيها جدا وبالعملى بتاعها
المذاكرة هتبقى منين
متشتريش ورق علشان تذاكر منها من مكتب التصوير خالص
كله ورق كورسات
بالنسبة لحضور المحاضرات
طبعا لازم الحضور لانها ماده محتاجه فهم جدا
نظام الامتحان ::
على سنتي السنه اللي فاتت يعني كانت M.C.Q
يعنى اختصار multi choice Question
يعنى اختار الاجابة الصحيحة من بين الاقواس بنظام الثانوى
وعلى فكرة نظام الاختيارى فى الكلية الاجابة عليه بتكون بانك بتختار الاجابةالصح وفىاول ورقة الاجابة بيبقى فى ورقة عليك انك تعلم على علامة صح على الرقم اصح
يعنى اول ورقة بتبقى اسمها answer sheet اول ورقة الاجابة ودى مش بيبقى فيها الاسئلة والاسئلة محدش بيدخل يقراها فىالتصحيح هما بس بيراجعوا الورقة الاولانيه دى
بالزبط زى فى الثانوى لما كنت بتلاقى الاسئلة ويقول لك الاجابات صفحة كذا فى الاخر

ده الكلام اللي انا قولته قبل كده وان شاء الله نزود النهارده ...............

الحيوان
نفس توزيعة درجات الفزياء والنبات
بس دى مفهاش شفوى لان محدش بيختارها فدرجات الشفوى بتتحول على التحريرى بتاع اخر السنة يعني بيبقى التحريري من 210 ازاي المجموع ده 150 تحريري و 60 درجة للشفوي للناس اللي مش بتختارها
المنهج مقسم لحاجتين
جزء ال DNA
الجزء ده عايز تركيز وفهم جامد جدا لانه جزء الى حد ما صعب يمكن يكون فيه اجزاء من اللي تمت دراستها في الثانوي لكن في حاجات جديده كتير فياريت تركزوا اوي على الجزء ده والدكتور بيشرح عى powerpoint واطمنوا مه لان احنا معانا المحاضرات بتاعت دكتور اسماعيل الشرقاوي اللي هيشرح لكم الماده ده باذن الله احنا كنا اخدناها من حضرته السنه اللي فاتت وان شا ء الله انزلها لكم هنا في الوقت المناسب لسه بدري شويه لان محتاجه شرح
وبالنسبه لامتحان الشيت في الجزء ده ذاكروا واعملوا اللي عليكم في ورق بينزل بيبقى في اسئله MCQ بيبقى حوالى 60 MCQا ظن خلاص عارفين هي ايه لان نظام الامتحان في الجزء ده question and MCQ
وفى اخر السنة بينزل زيهم بس بيبقى عدد اسئلةاكتر حوالى 180 سؤال اختيارى وبينزل خمس اسئلة فيها كتابه بيجى فى الامتحان اتنين او تلاتة منهم

محدش يقول انا هذاكر نص المنهج وابقى كده نجحت
لان حتى المهم الجزء التانى
بتاع دكتور محمد منى
ده اهم جزء
لان الجزء التانى مفهوش حاجة
الجزء بتاع دكتور محمد عبارة عن حفظ ومحتاج شوية فهم
ودكتور محمد منى من الدكاترة المحترمة قوى
واللى شرحها كويس
ومحاضرته كويسة
وبيقول اسئلة الامتحان فى المحاضرة
المادى دى بالذات ذاكرها من الكتاب
طبعا جزء دكتور محمد منى بس
انما جزء دكتور اسماعيل هتذاكره من المحاضرات وشويه من الكتاب وفي ورق بينزل للجزء ده وكمان الاسئله
الامتحان
نص دكتور اسماعيل سؤالين كتابة والباقى اختيارى
جزء دكتور محمد منى
اهتم بالرسومات جدا
ودورات الحياة
والامتحان بيبقى عبارة عن كتابة برضو

المادة مش محتاجة كورس لو كنت بتفكر فى كورس
لانها سهلة وعبارة عن حفظ

الانجليزى
بالنسبه للماده ده اللي هيشرحها دكتور سعيد الجوهري ومن الدكاتره المحترمه وهي ماده بتتكلم عن مقلات صيدليه انتوا بترجموها وتذاكروها وفي غياب بيتاخد في المحاضرات لان كل قطعه الدكتور بيخلصها ترجمة في اسئله عليها بيبدا يشوف الاسامي من الكشف ويسال بس يعني عادي مش عليها درجات كتير حكايه الحضور

والمهم اكتر واكتر انك تشترى الكتاب
وتحضر السكاشن بتاعتها
ولازم تعرف ال Idioms اللي عليك وترجمتها وكده وده من المحاضره طبعا وكمان ترجمة القطع
الامتحان بتاع الشيت عبارة عن شوية جمل من اللى كانت فى القطع دى والمطلوب منك انك تكمل الجمل على اساس انك فاكر القطعة
وشوية تعبيرات idioms تقول معناها او يجيب لك المعنى وانت تقول التعبير
واخر السنة بيبقى اسهل
لان بيجيب قطعة من الكتاب بالنص
ونفس الاسئلة
وانت بتجاوب عليها من النص فى القطعة
وعلى فكرة
لو مثلا عندك سؤال واحد واتنين
هتلاقى اجابة سؤال واحد من القطعة قبل الجزئية بتاعه اجابه سؤال اتنين
وبالنسبة لل grammer
قمة السهولة بجد منهج فعلا قمة في السهوله ومش تشغلوا بالكم بالماده ده مادة جميله وسهله جدااااااااااااااااااا

الرياضيات
مادة سهلة وخفيفة
عبارة عن جزئين
جزء دكتور محمد عزت عبد المنصف العميد السابق لكلية العلوم
وده عبارة عن تفاضل وتكامل
وهو بيقول على الاسئلة المهمة فى المحاضرة
وبيشرحها حلو
وهى اصلا عبارة عن منهج تانية ثانوى
بالاضافة لشوية تكامل من بتاع رياضة اتنين
لازم تحضر المحاضرات علشام الامثله اللي دكتور محمد بيذكرها لانه بيجيب نفس الافكار في الامتحان او نفس المسائل
والامتحان بيبقى عبارة عن اسئلة امتحانات سابقة
حلقات النقاش مجرد تدريب عادى على اللى انتم خدتوا فى المحاضرة او لو عاوز تفهم حاجة مش فاهمها
طيب هذاكر ازاى
من المحاضرات اللي انت هتحضرها وبرده على ايام الامتحانات بينزل ورق مسائل كتير جدا يعني ابقى حله كتدريب ليك
المادة سهلة ودرجاتها مضمونة
بس انت احضر وذاكر والمسائل بالنص من المحاضرة
توزيع الدرجات
الماده من 200
اخر السنة 120
والشيت من 80 وده مهم جدا لانه عليه درجات كبيرة
لان اللى بيحصل ان المفروض الشيت من 40 بس الكراسة من 40 برضو الكراسة
هتقول كراسة ايه ده ده عباره عن كراسه كده بتستلمها مع الكتب بيكون فيها مسائل المفروض والمطلوب منك انك تحلها وعادي يا جماعه حلوها كتمرين ليكم
بس اقولكم على سر الكراسات ده احتمال كبير جدا انها مش بتتفتح هما بس بياخدوها منكم علشان مش تدوها لحد من الدفعات الجديده
اللى بيحصل ان درجة الشيت بتدرب فى اتنين عادة
وده من كلام احد المعيدين اللى اعرفهم
الجزء التانى اللى نسينا نتكلم عنه شوية وهو الاحصاء
وعلى فكرة هو نفس منهج الاحصاء بتاع الثانوى بس بالانجليزى
بس انا من الناس اللي كنت بعاني في الجز ده لاني كنت علم نفس فمكنتش فاهم الموضوع من اوله بس الحمد لله الواحد فهم كل حاجه بس اللي بيكون فاهم اكتر من اول محاضره اللي كان احصاء في الثانوي
امتحان اخر السنةالمفروض انك تبقى مقفل التفاضل والتكامل بمعنى الكلمة
وبكده المفروض انك نجحت
والاحصاء تحل فيها كويس برده وان شاء الله لو حليت فيها كويس اضمن ان شاء الله الامتياز
والاهم انك تحل في الشيت كويس لانه عليه 40 درجه وبدرجه الكراسه يعني 80

الكيمياء الفزيائية
الجزء اللى هتاخده فى صيدله زى معظم مواد صيدلة
محتاجة حفظ
وهى فيها شوية معلومات عن حاجات ممكن تفيدك بعد كده
وشوية عمليات زى مثلا التبخر والتسامى والحاجات دى
ويعنى ايه محلول ومركب وتفاعل ايونى
وانا بصراحه الماده ده كنت بحبها جدا كانت من احب المواد ليا وان شاء الله برده هتلاقوها ماده لذيذه وكويسه جدا
المادة مقسمة لتلت اجزاء
جزئين تيع صيدلة
وجزء سهل حاول تضمنه تبع علوم
جزء Kinetic تبع دكتور ابراهيم سالم من علوم وده دكتور محترم جدا
وشرحه سهل وامتحانه سهل جدا
ولازم تضمن الجزء بتاعه
والجزء التانى من صيدلة اسمه Thermo ثرمو بس واللي بيشرح الجزء ده الدكتور مختار محمد مبروك عميد كلية الصيدلة والاتنين دول احضر كل محاضراتهم
وجزئهم سهل ومضمون فى الامتحان
الجزء برده اللي تبع صيدلة طويل شوية بس سهل للي يحبه ويفهمه ويحفظه
ودكتور ابراهيم سالم عامل موقع الالكتروني في كل الجزء اللي هو بيشرحه علشان تدخلوا تشوفوا الشرح وكده مره واتنين وتلاته وكمان تعملوا مع دكتور ابراهيم شات على الموقع
توزيع الدرجات زى الفزياء والنبات ودى من المواد اللى بتتاخد شفوى

ويا دكاتره هقولها تاني كمان انت الترم الاول بتاخد 3 مواد بس شفوي و 3 مواد دول الاغلب بياخد physical chemistry كيمياء فيزيائيه و Botany علم النبات و physics الفيزياء
اما الترم التاني فكل المواد اللي عليك شفوي معادا طبعا حقوق الانسان
وبالنسبة للعملى يا جماعه المطلوب منك في المقام الاول البالطو في معيدين بتضايق عليك لو ضرت في المعمل من غيره واي ادوات لما تدخلوا هما هيطلبوا منكم كل حاجه وهو قسم واحد بس اللي هيطلب قسم الحيوان
معروف برده ان مواد صيدلة هتاخد العملى بتاعها في صيدله
زي الكيمياء الفيزيائيه هتاخد العملى بتاعها في كليه الصيدلة معمل أ و جـ بالطابق الثاني
الرياضه هتاخد حلقات النقاش بالطابق الخامس في كلية الصيدلة
النبات والحيوان والفيزياء هتاخد العملى بتاعهم في علوم الحيوان كان في الدور السادس والنبات الدوء الرابع والفيزياء الدور الاول
انا يبقى كده كلمتكم عن كل المواد عندكم في الترم الاول في الكليه واي تعقيب من حضرتكم انا تحت امركم
وان شاء الله نتواصل في كلام اخر والسلام مسك الختــــــــــــــــــــــــــــام
السلام عليكم ورحمة الله وبركاته

ربنا يجازيك خيرااا يارب انت ومن معاك تقونا على الاعدادى واحنا ندفعكم للامام دايمااا ودائماا

ربنا يطمنك اية الموضوع الجامد دة بس بعد دة ممكن مطولش الموضوع علشان نحس بتشوق شكرا ليك يا دكتور مصطفى وربنا يوفقك فى كليتك وفى حياتك العلمية والعملية

والله يا رورو كان نفسى يعملهم حلقات على الرغم انى حفظتها من على البوابة بس يلا عادى اكيد هيجبلنا حاجات جامدة بقى ةكدة يعنى وربنلا يعنك يارب يا دكتور مصطفى ياااااااااااااااااااااااارب اللهم امين

شكرااا ليكةى انتى يا سمر الحمد لله يارب تكونى معيا انتى وريهام فى السكشن انتوا محسسنى انا انا عملت حاجة انا ما عملتش حاجة خالص والله دة ممكن يكون من عند ربنا بس والله

المنتدي جميل جدا وبنستفيد منه ولا شكر علي واجب وانشاء الله نكون انا وانتي وريهام في سيكشن واحد

ياااااااااااااااااااااارب يا سمورة يارب ونفيد بعض اكيد

سؤال معتاد اول ما بندخل الكليه فى الاعدادى بنسأله هو نظام الكليه ايه وهنعمل ايه والامتحانات اخبارها ايه واللدكاتره وكذا وكذا؟

بس عايزكو متقلقوش لانى بقدر الامكان هحاول اسعاعدكوا

وهبدأمعاكو من الاول خالص

الكليه
كليه الصيدله جامعه طنطا تتكون من ثلاث مبانى مبنين تم انشائهم والمبنتى الثالث تحت الانشاء

المبنى الاول: المبنى الرئيسى ودهيحتوى على مدرج فى الدور الاول علوى اما الدور الاول ارضى فده يحتوى على الشئون الاداريه للكليه والخزنه والمكتبه الالكترونيه ومركو الجمعيه العلميه الصيدليه وكمان فى الخر الدور يوجد معمل يلقى بداخله نظرى العملى لاعدادى صيدله قبل السكشن

الدور التانى : وده هنحتاجه فى الاعدادى كتير لانه فيه معامل الكيمياء الفيزيائيه والتحليليه والعضويه فى السنه كامله وكمان فيه حجرات الدكاتره علشان الامتحانات العملى وفى اول الدور فيه مدخل للمدرج

الدور الثالث: وده مش هنحتاجه فى اعدادى بس خلى بالكو لانه مهم علشان فيه حجره العميد وكمان وحده توكيد الجوده وكمان فى الناحيه التانيه من الدور فيه المكتبه

الدور الرابع : ده بقى فيه حجره الصوتيات والمرئيات اللى هتخدور فيها سكاشن اللغه طول السنه وكمان فيها معامل العقاقير للترم التانى

الدور الخامس :تستمر معامل العقاقير

الدور السادس : مش هتحتاجه الا فى انك تاخد سكاشن ماده الرياضيات

المبنى التانى: مبنى المدرجات

وده فى الدور الاول منه فيه شئون الطلبه اللى بتعتبر من افضل الهيئات الاداريه على مستوى الجامعه كامله

اما باقى الادوار فيوجد مدرجين على احدث واحسن طراز شاشه عرض وتكيف وميكرفونات

المبنى الثالث : انا قولت تحت الانشاء

.........يتبع

وهذا من موضوع دكتور احمد وذلك لتعاون دكتور احمد ومصطفى من احل الافادة وربنا يجعلها فى ميزان حسناتهم اللهم امين[/b]

جزاكم الله خيرا ياد/مصطفي وياد/احمد وشكرا ليكي ياساره ومنكم نستفيد

شكرا ليك بجد يا دكتور مصطفى وشكرا ليكي انتي كمان يا سارة
والله انا خايفة ومرعوبة جدا وانا نفسي يا سارة بجد اعرفك قبل الكلية عشان اكون عارفة حد هناك
لاني معرفش حد خالص
وربنا يجزيكم خير على المنتدى الرائع الجميل ده

sara كتب:

شكرا ليك بجد يا دكتور مصطفى وشكرا ليكي انتي كمان يا سارة
والله انا خايفة ومرعوبة جدا وانا نفسي يا سارة بجد اعرفك قبل الكلية عشان اكون عارفة حد هناك
لاني معرفش حد خالص
وربنا يجزيكم خير على المنتدى الرائع الجميل ده

بالله عليكى لا تخافى اولا ثانيا كلنا مع بعض واى حاجة اخوتنا هيقولنا اكيد وان شاء الرحمن نتعاون كلنا مع بعض واى حاجة يا سارة يعنى اكتر من الاخات كفاية اسمك على اسمى يعنى وكمان سكشن واحد يلاربنا معانا واى حاجة انا تحت امرك فى ما اعرفة

بسم الله الرحمن الرحيم

بداية أعزيكم بمضى شهر رمضان الكريم أعاده الله عليكم وعلى الأمة الإسلامية بالخير واليمن والبركة

واهنيكم بعيد الفطر المبارك وعيد سعيد علينا كلنا

ثم أهنيكم على الطفرة الجبارة اللى حققتوها فى الفترة القصيرة جدا اللى فاتت

أخص بالذكر الدكتورة سارة الطموحة الدءوبة والدكتور مصطفى الجينيس كما يقول وطلبة صيدلة طنطا ذكور وإناث يمكن مش جديد أوى لكن انا جديد على المنتدى علشان كدة ضغطت بايدى اليمين

ان شاء الله يكون عمل مبارك وجاد ومفيد ويسرنى انى ابقى معاكو سواء هنا أو فى الكلية وموجود معاكم فى المنتدى باستمرار ان شاء الله

لى بس بعض الأسئلة لدكتور مصطفى اذا سمح :-

1- هو انت فعلا عاشق الأقصى اللى بيلخص المحاضرات tiger

2- هل فعلا صيدلة طنطا بقت نظام جديد ولغوا مواد علوم دا مجرد كلام سمعته

دكتور احمد بجد حضرتك النهاردة فرحتنى بوجودك وان شاء الله نكون حاجةى مهمة ومفيدة والحمد لله وع فكرة دة مش طموح عندى ولا حاجة الفضل يرجع لاخواتى كلهم الى عونونى بس والله

ازاى بس دا انا اللى المفروض اشكرك على الجهد الضخم ده فى المدة دى ويارب يباركلكم ويزيدكم ويوفقكم

يارب لينا كلنا اكيد يعنى ونكون ناس كويسة وتمام

السلام عليكم في البدايه اهنئكم بعيد الفطر المبارك وكل عام وانتم بخير
وعندي شويه استفسارات ياريت د\ مصطفي يفيدني
اولا \عايزه اعرف في اسر في الكليه ولا لأ ولو فيه نظامها ايه وايه عيوبها وايه مميزاتها؟؟؟
ثانيا\ اول يوم في الكليه بيكون في محاضرات ولا لأ ولو فيه بتبدأ امتى؟؟؟؟؟؟؟؟؟؟؟؟؟؟؟؟؟
وكل عام وانت بخير

وانتى بالف صحة وسلامنة يا سمورة ربنا يخلينا لبعض ان شاء الله ابعتى السلام لمنوفية كلها

Dr..Ahmed كتب:

لى بس بعض الأسئلة لدكتور مصطفى اذا سمح :-

1- هو انت فعلا عاشق الأقصى اللى بيلخص المحاضرات tiger

2- هل فعلا صيدلة طنطا بقت نظام جديد ولغوا مواد علوم دا مجرد كلام سمعته

بالنسبة للاستفسار الاول لا يا دكتور احمد انا مش عاشق الاقصى ده دكتور اكبر مني في فرقة تانيه تقريبا والورق ده ساعات بيكون من محاضرات قديمة بتاعت السنين اللي فاتت
....................................................................
تاني حاجه هل صيدلة طنطا بقت نظام جديد ؟
لا يا دكتور احمد لان احنا ما زلنا بندرس مواد كلية علوم واظن انا وضحت ده في بداية الموضوع في المواد اللي هيتم دراستها مش معقول هيغيروا السنادي
لان ده نظام كلية وكمان لو اتغير دول بيلغوا مواد ويضيفوا لكم مواد من اولى فلا طبعا احنا ما زلنا نظام قديم
.....................................................................
واي استفسار تاني انا وزمايلي تحت امركم...

dr_samar كتب:

السلام عليكم في البدايه اهنئكم بعيد الفطر المبارك وكل عام وانتم بخير
وعندي شويه استفسارات ياريت د\ مصطفي يفيدني
اولا \عايزه اعرف في اسر في الكليه ولا لأ ولو فيه نظامها ايه وايه عيوبها وايه مميزاتها؟؟؟
ثانيا\ اول يوم في الكليه بيكون في محاضرات ولا لأ ولو فيه بتبدأ امتى؟؟؟؟؟؟؟؟؟؟؟؟؟؟؟؟؟
وكل عام وانت بخير

كل سنة وحضرتك طيبه يا دكتور سمر
بالنسبة للأسر اها موجوده في الكليه بس من ناحية نظامها وعيوبها مش هقدر افيدك فيها لاني مش اشتركت فيها بس ممكن اسال لحضرتك حاضر
وفي كمان جمعيات في الكليه ونشاطهم كويس جدا
زي الجمعيه العلمية الصيدلية Tantapss
وزي الجمعية الادبية
ودول نشاطهم في الكلية ملحوظ وهتلحظوه من اول يوم ليكم في الكليه وكمان لما يعملوا لكم حفل الاستقبال بتاعكم

اول يوم في الكليه اها كان في محاضرات بس مش تقلقي هي محاضرتين ولا حاجه والدكتور بيقول كلمتين وعلشان كمان التهئنه وكده وغاليا اللي هيدخل لكم العميد دكتور مختار بس العملى بيبقى بعد ما يعدي اول اسبوع تقريبا بس السنادي ممكن النظام يتغير ويبداوا على طول علشان التاجيل اللي حصل في الدراسه لان السنه اللي فاتت كنا بداين من يوم 20 نوفمبر والسنادي هيبقى 3 اكتوبر
واول يوم بيبقى لذيذ وجميل وخصوصا لو رايحه مع اصحابك مش هتحسي بشئ غريب ابدا
...................................
واي استفسار انا تحت امركم